RASË

Secila nga trajtat e ndryshme që merr emri, mbiemri

ose përemri gjatë lakimit, që shpreh një kuptim të caktuar

gramatikor dhe që shërben për ta lidhur fjalën përkatëse me

gjymtyrët e tjera të fjalisë; kategoria gramatikore që shprehet

me këto trajta. Rasa emërore (gjinore, dhanore, kallëzore,

rrjedhore, thirrore, vendore). Rasa parafjalore. Rasë e drejtë

(e zhdrejtë). Rasat e emrit. E lakoi në të gjitha rasat.

RASOR

Që i përket rasës, i rasës; që bëhet me anë të rasës. Trajta

rasore. Mbaresa rasore. Përcaktim rasor.

RELATIV

Që tregon cilësi a tipar në mënyrë të ndërmjetuar (për

mbiemrat si i gurtë, i drunjtë etj.). Mbiemra relativë.

RENDOR

Numëror rendor, numëror rreshtor.

ROMAN

Që e ka prejardhjen nga latinishtja popullore dhe që është

vazhdimi i saj; neolatin. Gjuhët romane italishtja, spanjishtja,

portugalishtja, frëngjishtja, rumanishtja etj.

ROTACIZËM

Kalimi i n-së në r në mes të dy zanoreve në fjalët e disa

gjuhëve e në dialektet. Dukuria e rotacizmit.